هي الأم متى تاكل؟

هو سؤال صريح و أنا ماني عارفتله جواب الحقيقة والاقي الوضع يزداد سوءاً مع ازدياد عدد الأطفال في المنزل…

الصباح أقول لنفسي دحين أروح أفطر… دحين أفطر… دحين أفطر…بس خليني أطلع لهم ملابسهم عشان تكون جاهزة…بس أشوف شنط المدرسة تمام…بس أروح أطفي المكيف…و يصحوا و لبسي هادا و غسلي لهادا و فطري هادا و لو اني شاطرة أخدلي لقمة على الماشي بس الشاطرة فيكم اللي تقدر تقول انها تفطر فطور كامل و تبر نفسها- أضربلها تعظيم سلام!! …و الشرط هنا مو انك تتفلحني و ترمي على الخدامة و تسوي هي الشغل و انتي تتكي!

أقول لنفسي  طيب أروح آكل في الشغل هناك على رواق و أشربلي فنجان قهوة محترم…وأول ما تدخلي تبدأ المكالمات و الأوراق و الإجتماعات (و مو عشان أنا فتكة ولا مهمة بزيادة بالعكس كلما قلت الكفاءة زادت اللخبطة و الشغل كله أخر لحظة – و آدي شغل الحكومة!) و تسير الساعة 11 و أنا لسه على لحم بطني…و آخدلي ساندوتش ميت من الكفتيريا البائسة و عصير مخزن و لو قدرت أكمله أعتبر نفسي أنجزت!

في البيت وقت الغدا تغرفي و ماما حطيلي و ماما قطعيلي و ماما صبيلي و ماما أبغى و ماما أكليني و هادي ماما أكلها برد و يجيكي اللي خلص بالعافية و يبغى حمام و قومي يا ماما وديه الحمام و غسليله و أيت أكل تبغي تاكليه و الأكل بارد و نفسك انقرفت بعد رحلة الحمام و تبلعي الموجود تأدية واجب و الحمد لله…استمتعت؟ أكيد طبعاً!

يجي وقت النوم و تقولي دحين إذا ناموا أروح أزبطلي عشاء ملكي…و بعد المناحلة و الحكاية و الناموسة و رحلة حمام ضرورية تانية و اقعدي معانا الين ننام تكوني انت نعست و احتمال كمان يغمى عليكي من الارهاق قبلهم – عشاء مين؟! لا و الله النوم سلطان…يمكن إذا صحيت في وسط الليل اتسحسب زي الحرامية للمطبخ و آكللي حاجة خفيفة…يمكن!

 

17 ابريل 2014

Motherlode

Common Sense Parenting for Healthy Happy Families in Saudi Arabia

World Moms Network

Connecting mothers; empowering women around the globe.

Saudi Birth Story

Common Sense Parenting for Healthy Happy Families in Saudi Arabia